恒大去盡誓炒歷基韋亞

猪拉多纳

亞洲冠軍球會盃今晚上演8強首回合，中超代表廣州恒大（足智彩譯：FC廣州）主場迎戰卡塔爾歷基韋亞。恒大上屆於8強飲恨止步，球隊上下對出局耿耿於懷，今次主場出擊務求盡數對手打好出線基礎。客軍新球季仲未展開，狀態未上力，恒大有力淨勝兩粒開「讓球主勝」。（now 671周三晚8時直播）

恒大去年起用名帥納比執教，最大目標就係要衝出中國、稱霸亞洲，可惜上屆8強出局未竟全功。今屆球隊一早落咗柯打，無論咩情況下，一定有幾多數幾多免夜長夢多，加上佢哋目前喺中超榜首有14分領先優勢，可以心無旁騖全力備戰。
廣發英雄帖唔可以失威

據內地傳媒報道，恒大賽前廣發英雄帖，邀請國家體育總局、中國足協負責人及其餘15支中超球隊領導層親臨球場睇波，足證佢哋幾有決心，如果贏唔到真係好難向全國交代。

歷基韋亞係上季卡塔爾聯賽亞軍，不過新一季卡塔爾聯賽未開咧，球隊近期備戰主要都係約戰熱身賽，論比賽狀態難及恒大，加上右翼衞穆罕默德梅沙及塞爾加爾國腳中場迪亞受傷倦勤，攻守力量都受影響，作客形勢更加唔樂觀。