雲格失方寸遭喪插

猪拉多纳

個陣甩皮甩骨 點讓費倫巴治

得番8個一隊成員，兵工廠作客仲要讓波？有冇搞錯！歐聯附加賽首回合，費倫巴治主場鬥阿仙奴，客軍傷兵多到嚇死人，領隊雲格唔知點排陣之餘，最近仲被傳媒、同行及自己友喪插搞到方寸大亂，費倫巴治面對甩皮甩骨嘅對手，受讓筍爆！（有線61及201台周四凌晨2時45分直播）

今夏號稱有7,000至1億鎊擴軍嘅阿仙奴，最終買人得個桔，只係免費簽入法國小將耶耶辛洛高。球隊並無加深板櫈深度，結果新季英超首仗就「現眼報」，主場1比3輸畀阿士東維拉，而且仲一次過傷晒阿歷士張伯倫、沙格拿、基蘭基比斯、路斯基同艾朗藍斯，正選陣容得番梅迪薩卡、韋舒亞、辛迪卡索拉、禾確特、普多斯基、基奧特健健康康，雲格被逼徵召4名青年軍隨隊，認真濕滯！
加歷查嘲買人「臨急抱佛腳」

雲格知衰即刻慌忙出價羅致紐卡素中場卡比耶，點知畀對方嫌出手低，又畀喜鵲領隊柏杜話喺呢個時候提出收購係唔尊重佢哋。已經退休嘅利物浦名將加歷查都出嚟「抽水」，話雲格如果咁鍾意卡比耶，點解唔早一個月買佢，依家咁做睇到雲格只係「臨急抱佛腳」，就算買到人都唔會幫到球隊。

其實外界批評唔緊要，最慘連自己友都唔撐，前鋒基奧特賽前都話兵工廠需要引入多一名前鋒，擺明落雲格面，面對內憂外患，雲格想闖過歐聯附加賽呢關真係唔容易。今晚對手費倫巴治本身係唔嘢小，呢支土耳其勁旅上季獲聯賽亞軍兼盃賽冠軍，古積特、魯爾梅利斯及安利都有級數，主隊受讓值得捧場！