馬體會巴塞鬥入波

猪拉多纳

韋拿倒戈撼美斯火爆

西班牙超級盃首回合開騷，由上屆西班牙盃盟主馬德里體育會主場迎戰聯賽冠軍巴塞隆拿，焦點落喺新加盟馬軍嘅射手韋拿身上，以往佢同巴塞王牌美斯勁多牙齒印，搞到被投閒置散，今仗首度倒戈，誓要射爆舊東家一吐烏氣，況且兩軍交手例演入球騷，大盤有買趁早。（now 632周四清晨5時直播）

當初韋拿喺巴塞為咗遷就美斯改踢左翼，士哥助攻瓣瓣有，任勞任怨交足貨，不過美斯唔多Like佢，試過韋拿入波唔同佢慶祝兼黑面，上季對ＣＦ格蘭納達，因為韋拿喺死位選擇射波而非回傳而錯失良機，激到美斯紮紮跳，兩人即時吵大鑊，冇耐韋拿就被換走，並且長坐冷板雪到硬晒，擺明係得罪球王嘅下場，亦嚴重影響韋拿嘅狀態。
近15次對碰全開大

忍無可忍嘅韋拿今夏低價改投馬體會，不但可長期擔任佢最鍾意嘅中鋒，仲有得踢歐聯，對佢爭取入選國家隊玩明年世盃大有幫助，如今重遇仇人美斯，更會加多兩錢肉緊，佢賽前明言今仗入波一定慶祝，配合腳風頗順嘅迪亞高哥斯達，火力強勁。

當然巴塞亦非善男信女，喺新帥馬天奴領軍下，重拾前場壓迫踢法，逼到對手有氣冇碇抖，其接手後四仗狂轟25粒，依家眾將信心爆棚，連之前為人詬病嘅法比加斯及阿歷斯山齊士亦有復甦迹象，上仗聯賽大炒利雲特七蛋，法比仔就送出三次助攻，而馬帥去到下半場先讓「新比利」尼馬披甲及換走美斯嘅舉動，擺明係為今場波做好準備。

翻查紀錄，若果以中位數2.5球計，雙方近15次碰頭竟全部開大，當中不乏4比3、5比2、4比2等大手交易，為爭新季首項錦標必搏甩髀，入球大屬不二之選。