費倫巴治下盤博得過

猪拉多纳

兵工廠傷兵成籮學人讓波

歐聯附加賽首回合今晚由費倫巴治主場對阿仙奴孭飛，個人嚟講，我都唔希望兵工廠被踢出歐聯，不過佢哋傷兵成籮，甚至話正選11人陣容都未必湊得齊，加上傳出領隊雲格又啟動「亂買人模式」，進一步打擊士氣，作客讓平半，不如博費倫巴治1.72倍下盤。（有線61、201周四凌晨2:45直播）

阿仙奴原本話有7,000萬鎊可以擴軍，點知最後買唔成利物浦射手蘇亞雷斯，新球員只得免轉會費簽入嘅歐塞爾前鋒耶耶辛洛高，即係轉會市場上斗零都冇用過，難怪廠迷要脅再唔使錢就發起抗議，尤其經過開咧戰先開紀錄、最終反以1:3慘負阿士東維拉嘅打擊，據講領隊雲格會再次展開求其買人行動，是但買幾個球員向球迷交差。
雲格增兵臨急抱佛腳

記得前年兵工廠又係唔掂，搞到匆匆忙忙趁轉會市場關閉前掃入中場阿迪達、班拿約、後衞梅迪薩卡同安德里山度士，結果得阿迪達啱用，今次佢哋又有大把目標，但無論最後收購咩人，都肯定唔係廠迷等緊嘅巨星級球員，而且咁搞法，好容易令阿仙奴球員覺得自己即將失去正選位置，大戰當前仲要咁多嘢諗，想踢好波都難！

最慘就係，日前兵工廠對維拉再傷幾件，包括翼鋒阿歷士張伯倫重傷可能抖半年，殘陣出戰輸埋都唔出奇，特別係對家費倫巴治今季陣容冇大變，仲加入辛尼特中堅般奴艾維斯同利華古遜左閘卡特歷，何況前鋒古積特、中場魯爾梅利斯同中堅尤保全部踢過英超，熟晒阿仙奴鍾意歎慢板嘅路數，首回合要開下盤搶分真係唔難。