亞洲老闆大蝦細 雙城記曼夫莫迪

猪拉多纳

今場英超上演亞洲老闆大對決，升班球隊卡迪夫城主場挑戰勁旅曼城，「卡城」有馬來西亞富商陳志遠撐腰，今夏使咗超過2,000萬鎊增兵，支出係三支升班球隊當中最多。不過，富豪球會曼城嘅阿聯酋老闆文梳亞今季喪燒近億鎊掃貨，超豪陣容星光熠熠，並非雜牌軍「卡城」所能抵擋，直取2倍「讓球客勝」！

（now 621周日晚11時直播）
「紅龍」衰在冇火力

「紅龍」卡迪夫城成功殺上英超，老闆陳志遠拍心口話會科水買人，佢並冇食言，今夏先後引入熱刺中堅哥爾卡、西維爾中場加利美度及哥本哈根前鋒哥尼利斯等，當中以前兩者較具名氣，淨係呢三件新兵都要超過2,000萬鎊轉會費，配合韋定咸、比拿美同費沙甘保等升班功臣，人腳唔算太差嘅，但到底能否企穩英超，仍然有待觀察。睇番開咧戰演出，「卡城」最大問題係進攻乏力，作客中型班韋斯咸全場僅得一次射門中龍，呢次硬撼曼城更難樂觀。
「藍月亮」攻力得人驚

曼城老闆文梳亞貴為阿聯酋超級富豪，佢輕輕開水喉畀新帥比歷連尼買人已經好得人驚，新季增兵四大天王費蘭甸奴、捷西斯拿華斯、祖維迪及尼格度，加埋燒咗接近一億鎊，配合迪斯高及阿古路等星級攻擊球員，成功打造全英超最勁嘅攻擊團隊。「藍月亮」曼城聯賽首戰主場對紐卡素，陣上清風送爽大勝4比0，射手尼格度只係尾段入替，祖維迪直頭唔使踢，已經贏到「喜鵲」冇得打，姿態真係好驚人，今次遇上升班球隊卡迪夫城，隨時又開殺戒。

曼城隊長高柏尼今場因傷休戰，唔少球迷擔心佢哋後防唔夠穩，不過，另一中堅拿斯達錫已經傷愈，可以同尼史葛扼守中路，老老實實，穩就唔係好穩o架喇，但考慮到「卡城」冇乜攻力，相信已經夠殺。
領隊Chit Chat

馬基麥基(卡迪夫城)：淨係睇見曼城後備席坐緊啲乜人，已經知佢哋係頂級球會，但我深信曼城都會尊重我哋。

比歷連尼(曼城)：我希望球隊踢得更具侵略性，無論贏輸，全場不斷爭取士哥，相信球員都好享受呢種打法！