衰到貼地仲要讓波 聖保羅擺「明」有計

猪拉多纳

邊個未衰過？衰唔緊要，唔好衰到貼地就得喇！2006至2008年連奪3季巴甲冠軍嘅聖保羅，對上4季已淪為陪跑分子，今季班球員仲好似唔識贏波咁，14戰只得2勝5和7負得11分，最大劑係佢哋連續12場巴甲未贏過，差3場就可以追平「巴甲最屎」連續15場不勝嘅紀錄，老大哥門將羅渣里奧賽前鼓勵隊友，話唔想「破紀錄」就生生性性，早日贏波止頹風，難得今場到訪嘅富明尼斯近況同樣麻麻，又有巴西盃後顧之憂，讓平半嘅聖保羅博得過啦！（開賽時間：周一凌晨3:00）
羅渣里奧開腔鼓勵隊友

隨住富明尼斯同哥連泰斯等傳統勁旅再次崛起，聖保羅呢幾年都冇乜點威過，精神領袖、今年1月滿咗40歲嘅「門神射手」羅渣里奧，喺接受巴西傳媒訪問嗰陣，就話自己職業生涯破過無數紀錄，包括為聖保羅上陣1,000場，同埋射入100球等等，但就點都唔想球隊喺佢仲係首席門將嘅情況下，連最醜死鬼嘅「最長不勝紀錄」都破埋：「我同意教練所講，成隊波陷入信心危機，但我希望各位隊友扚起心肝，踢好每一場比賽，其他事上帝會為我哋安排。」目前巴甲「最長不勝紀錄」由聖卡坦奴同阿美利加納泰，分別喺2006年同2007年球季創下，咁啱呢兩季巴甲盟主都係聖保羅。

點解「四眼哥」會撐聖保羅呢？係，雖然聖保羅啲射手好似路爾斯法比安奴咁冇料到，但防守其實唔太屎，近兩戰都和到帕拉尼恩斯同法林明高，表現唔係想像中咁衰。難得今鋪主場出擊，迎戰近況唔好得幾多，兼且三日後有場巴西盃次回合，要作客戈亞斯跟尾嘅富明尼斯，仲唔博埋條老命求贏呀？而且聖保羅近績衰到咁都仲要讓波，就反映莊家都防佢哋會反彈啦！