冇牙拜仁死搓 鍊唔贏戰車

猪拉多纳

「巴塞式進攻」未練好

歐洲超級盃今晚爆發，由去屆歐聯冠軍拜仁慕尼黑火併歐霸盃盟主車路士。有留意拜仁嘅球迷，都發現呢支德甲班霸開季走晒樣，新帥哥迪奧拿套「巴塞式進攻」一味得個搓字，根本不切實際，今晚喺布拉格伊甸球場想報番11至12球季歐聯決賽一敗之仇？難啲喎！仲要讓到成半一咁多，梗係捧穩打穩紮嘅車路士下盤着數啦！（有線61及201、中央5台周六凌晨2:45直播）
車仔開季僅失1球

以湯馬士梅拿同紐亞為首嘅拜仁主將，賽前都話對前季歐聯決賽耿耿於懷，今晚一定要報仇咁話。講就容易，呢隊上季三冠王今季由哥迪奧拿接手之後，明顯仲處於過渡期，布陣場場都唔同，哥帥擺到明仲未搵到心水陣式。

就講周中場德甲吖，哥迪奧拿為留力應付今晚場歐超盃，幾乎派遣半隊副選出擊，就算全場有74%控球權兼17次射門，最後都只係同弗賴堡打成1:1平手，再次反映哥帥套戰術模式好睇唔好食，想咬得入開季只係失過1球嘅車路士唔容易。
小豬扭傷足踝紮住上

況且拜仁今季由4231陣式轉型為4141陣式，單防中令防守壓力大增，雖然話周中扭傷右腳足踝嘅舒韋恩史迪加可以趕及復出，但紮住上要頂得住由奧斯卡杜斯山度士、舒賀爾尼同夏薩特組成嘅中前場三叉戟肯定惡啃。

據《衞報》透露，莫連奴收購朗尼失敗之後，好有機會羅致前安治射手伊度奧，加上攻擊中場韋利安已經來投（見下文），一班以費蘭度托利斯為首嘅球星肯定人人自危，為保飯碗今仗唔加多兩錢肉緊點掂？車路士啱啱喺聯賽同曼聯互交白卷，弗到漏嘅尹佩斯拍住朗尼都撕唔破「藍戰士」大門，拜仁呢隊冇牙老虎憑咩鍊贏車路士先？
車仔3戰半場不敗

‧車路士開季3戰未試過半場落後。

‧拜仁連續3仗開入球細。

‧車路士新季3戰都開角球細。
乜都玩錦囊

拜仁攻擊球員係有卡士，弊在仲未適應哥迪奧拿套進攻模式，近期面對法蘭克福、紐倫堡同弗賴堡合共只係入得4球，火力真係冇乜說服力。何況車路士領隊莫連奴最耍家打守勢波，以「藍戰士」開季只係失得1球咁大把嘅表現嚟睇，今場波唔慌多波入，1.95倍細好路呀！