慕遜強陣「不」勝無歸

猪拉多纳

鋒將爭位實同你砌

慕遜加柏嘅貴價前鋒盧克迪莊喺星期二啱啱過咗23歲生日，雖然佢喺新季淪為後備，但呢位荷蘭射手講明唔會離隊，希望全力博表現重奪正選咁話，小弟相當欣賞佢呢種態度，既然慕遜前線人腳充足火力有保證，今晚迎戰雲達不來梅，一於強捧1.68倍主W啦！（有線61及201、中央5台周六晚9:30直播）
不來梅3戰入得2粒

慕遜加柏一開季就硬仗連場，作客輸畀上季「一哥」拜仁慕尼黑同季軍利華古遜都係非戰之罪，不過面對住同級數嘅球隊，佢哋就真係驚都未驚過喇！因為慕遜嘅鋒力相當厲害嘛！新加盟嘅巴西前鋒拉菲爾基達奴有質又有態，拍住土炮指揮官麥斯古斯，堅過石堅！呢對拍檔仲搞到連堂堂荷蘭國腳盧克迪莊，都被迫要坐後備席添！

不過呢種良性競爭，阿占就覺得對慕遜加柏係百利而無一害，淨係睇佢哋近3戰雖然只得1勝2負，但就攻入6球，咪忘記連核心人物艾蘭高喺上星期都開埋齋，今鋪返到主場，陣中又冇乜重要傷兵，肯定全力喪攻搶3分！

相比起主隊嘅強大火力，雲達不來梅開咧3場聯賽只係入得嗰2球，主力射手尼斯彼德臣唔經唔覺已經有成1,228分鐘未喺德甲入過波，即使教練杜特走出嚟解畫讚佢努力，但一個射手咁耐冇波入，乜信心都冇晒啦！事實上，不來梅今季冇咗奇雲迪布尼後創造力大減，柱躉前鋒彼德臣冇供應，根本同廢咗武功冇分別，今鋪作客慕遜，聽抬蛋都得咯。
頂占筍盤：慕遜加柏（主勝）