大摩四駒攞頭威

猪拉多纳

　　早幾日跟大家分享了在下季初的度馬心得，今日不妨把焦點放回開鑼日的十場賽事上。二十四廐中，除了胡森馬房冇馬出外，其餘倉主或多或少都有派馬上陣，始終開鑼日，有邊個唔想快快贏馬，攞番個頭威？

　　驟眼看，東廐派得最多上季尾有佳作的馬匹出場，如「美麗昇華」、「卓爾名駒」、「萬事勇」等等，是否代表他可在開鑼日贏到開巷？在下認為未必，事關他這手馬上季尾雖然弗，但評分亦增長了不少，當中如「美麗昇華」及「卓爾名駒」都是首次出爭二班賽，要贏，難度唔係低。若果屆時被捧為熱門，實在唔值博。

　　反觀大摩馬房，咪以為他出四駒就冇料到，睇番該四匹參戰馬，「卡達聖」前季初曾於107分時贏國際二級賽，今次又係評107分，但跑一班賽特首盃，相當着數； 與前駒齊齊爭盃的「傾力之城」現時只評100分，但此駒上季曾於117分時，在本地二級賽獲亞，爆巨冷又唔奇。至於「飛闖」，上季減分多大家都知，而且此駒今季晨早復課，早前又參與試閘嘉年華，雖然得第五，但係大倉嘅馬試閘冇嘢睇，落場澎澎聲贏馬有咩咁奇？最後講「摩法神采」，經過暑期評分後，牠現評96分，前季尾牠正是在96分獲冠，今次照辦煮碗其實唔難。(洋超)