財神駕到程序對辦

猪拉多纳

　　試完大閘又再安排拍跳工夫，姚廐馬「魅影蹄飛」果真贏馬交代，只可惜馬房當日一併打王牌的另一牌面馬「一定贏」，因受氣管有血影響，只跑第四；引伸到今晚開鑼谷戰，姚本輝馬房又有動靜。

　　第四場四班1650米「財神駕到」，既是落班而來，模式上與「魅影蹄飛」十分相似。此駒是匹抬腳比較高，步韻唔易掌握的馬，雖然嘉年華大閘末段騎得緊要，但非短途馬兼且路程短，省一省熱身，我倒覺得問題不大，反之，更收熱身之效。其後，此駒上周再拍了兩課，操練工夫比「魅影蹄飛」只拍一課更肉緊硬淨，再者，呂卓賢今季操多了而摸到馬性，可博。

　　第五場四班1200米，「咁都得」近兩季皆一出即勝，唞唞埋埋隨時是另一匹馬，八月中大閘無疑已試得有頭有尾，今次用呂卓賢減七磅，你邊夠佢放？係博呢鋪！(馬會賽事 首席評述員)