潘頓尾三場掂

猪拉多纳

　　潘頓首日成績見得吓人，騎足10場，半數上名，捧走特首盃之外，食埋尾胡，一開波即起孖，睇嚟今季仍然有雄心壯志爭冠軍，呢期佢又有幾多子彈，畀人感覺係會連場出擊。

　　上季同晚谷草首次賽事，潘頓認真威水，差不多場場入到前列，而當晚贏到兩W，若果同今期7匹坐騎比較，呢次批馬機會仲突出，要贏兩場唔係難，有冇3W就要睇運數。點解話要睇運數呢？因為有部分坐騎唔好彩排中外檔，今期係就係跑谷草A欄，好似會公平啲，但跑落有冇偏差就唔知。不過，佢頭幾場坐騎排晒內檔，唔會有影響。

　　表面上，第六場至第八場潘頓執唔到好籌，排檔最好已經係8檔，諗深一層，佢在尾三場坐騎全屬超班馬，「奇勇」、「天合」和「喜多盈」3隻年輕好手，今季夾埋可能贏到十場八場，既然有分在手，只要唔係跑得差、際遇曳，自然有本錢。3駒之中，方仔兩件比較鍾意，「奇勇」上季差啲撼低「美麗昇華」，實力有必要重新估計，升上一班唔使等好耐，留在三班，小巫見大巫；「天合」幾成狀態已可在上季跑入三四名，此駒成材機會好大，唞完暑，如進度好少少，幾難搵到對手。（Jack）