皇馬亂龍讓唔起維拉利爾

猪拉多纳

球壇話題人物加里夫巴利幫新東家皇家馬德里宣傳橙色嘅第二作客球衣，教練安察洛堤賽前話巴利今場一定會落場，不過未知正選或後備，有報道話佢會踢番出道個位，即係出擊左閘，安察洛堤賽前就話佢會踢右邊，不過尋日賽前操練，傳媒影到C朗練波時對住巴利吓吓唔錫力剷落去，話冇心病都唔信，而巴利外父就爆料，話囡囡Emma將會帶埋乖孫搬埋馬德里陪巴利。
莎拉ＢＢ未知邊度出世

另一邊廂，坐冷板櫈嘅卡斯拿斯，其未婚妻莎拉腹大便便出席公開場合，佢話未知ＢＢ喺邊度出世，暗示「聖卡斯」想走，莎拉又話個仔可能改名Lionel向美斯致敬。

睇住兩單新聞，就知皇馬更衣室幾咁亂，加上佢哋不幸染上FIFA病毒，艾斯高、法比奧干查奧同馬些路均帶傷而回，就算出得亦唔慌弗，碰巧升班球隊維拉利爾開咧連贏三場，墨西哥新援杜斯山度士入波助攻瓣瓣有，加上「銀河艦隊」有歐聯作客加拉塔沙雷嘅後顧，面對如狼似虎嘅維拉利爾隨時擱淺，斯維強捧有2.5倍嘅「讓球主勝」。