巴素利星散博車路士「讓主」

猪拉多纳

有云冤家路窄、狹路相逢，好似車路士同巴素利咁，上屆歐霸盃4強先至碰頭，今屆歐聯又咁蹺抽入E組，都咪話唔邪。可惜巴素利多員猛將今夏相繼被挖走，戰鬥力大幅減弱，今晚作客史丹福橋難以扭轉上屆大敗命運，吼實車仔1.78倍「讓主」。

（有線64及203周四凌晨2:45直播）
莫帥要重新鑄造黃金戰車

巴素利喺上屆歐霸8強砌低熱刺堪稱代表作，之不過「後遺症」就係陣內猛將被撬走，除咗箭頭蘇奧亞同中場卡巴拉接連離隊，防線核心達高域與朴柱昊亦分別轉投基輔戴拿模及緬恩斯。縱使阿根廷中場馬迪亞斯迪加度鳥倦知還，季前由艾查捷拉重投巴素利懷抱，但踏入三字頭嘅佢已無復當年勇，實際作用有限。

雖然車路士日前喺英超不敵愛華頓後，領隊莫連奴都認低威話車仔再非04年嗰支牢不可破嘅球隊，但矢言會重新鑄造「黃金戰車」，將車仔變得高效、成熟，再踢出勁多入波嘅漂亮足球，筆者認為，今場鬥實力有明顯分野嘅巴素利，正係莫帥實踐「理論」好時機。何況「獵豹」伊度奧加盟後，與費蘭度托利斯及丹巴巴亞為箭頭位置爭崩頭，邊個落場都勢必搏盡，配合埋夏薩特、奧斯卡杜斯山度士等幾名進攻好手，就算拉美利斯要坐波監，但以攻代守嘅車仔要贏兩粒話咁易。
歐聯E組