曼聯The best buy is no buy

猪拉多纳

Peter唔係想話莫耶斯，不過球隊今夏係咁講想買進攻中場，分別同奧斯爾、法比加斯傳過「緋聞」，但原來最好嘅進攻中場一早就喺球隊入面。曼聯喺上周中歐聯分組賽對德甲利華古遜，莫耶斯排出4-2-3-1陣式，進攻中場分別由路爾斯華倫西亞、朗尼和香川真司擔任，其中朗尼和香川真司踢得好好，令單箭頭尹佩斯如魚得水，助球隊大勝一仗。
朗尼香川餵飽尹佩斯

用「The best buy is no buy」嚟形容曼聯實在太貼切，球隊今夏不斷傳出要買進攻中場支援尹佩斯，但原來「踏破鐵鞋無覓處，得來全不費工夫」，最好嘅進攻中場一早已經喺球隊入面，仲要有兩個咁多，就係朗尼同香川真司，所以真係「唔買好過買」。Peter知道有句金句係每個教練都會記住，就係「知人善用，而非唔熟唔用」，莫耶斯同朗尼唔啱其實係公開嘅秘密，但如果兩人今夏肯開心見誠溝通，抱住對事不對人嘅心態去處理問題，相信曼聯嘅表現會更加好。

講完進攻中場，Peter睇到曼聯陣中依然有好多防守中場，除咗湯卡華利、卡域克、路爾斯安達臣外，仲有能攻善守嘅「爆炸頭」費蘭尼，數量多過好多英超球隊。

Peter相信球隊中場落力做好防守，就係贏冠軍嘅先決條件。睇吓車路士陣中就係欠缺好嘅防守中場，約翰米基爾平庸、艾辛無復當年勇、拉美利斯踢到殘晒，搞到主帥莫連奴無人可用，球隊近期成績亦有所回落，所以Peter成日話，就算球隊星光熠熠都係冇用，最緊要就係夠實用。
金句：家有二寶 等到歐聯才搵到