韋達潘頓難估 吼杜利萊好過

猪拉多纳

　　上期谷草賽事，人人吼住韋達及潘頓，最後獨得韋冠軍贏到1場咁大把！潘頓由頭輸到落尾，冷門固然冇影，熱門如「金滿載」，一樣可以贏唔到！有時運氣，話唔，就唔。

　　呢期田草形勢又唔同，潘頓坐騎冇咁惹飛，相反，韋達手上好多熱門馬，會唔會失望而回？抑或大手出擊？視乎大家點睇，總之，最怕捉錯路，落，畀人賣豬仔都唔知。

　　其實，今日杜利萊出賽馬幾勁，頭場「威祥」剛剛上名、第六場「赤龍駒」復出跑第四名、第九場「星光騎士」上場剷入連贏位，呢3匹馬已經好有爭勝本錢。

　　大運財賺級數

　　重頭戲兩項盃賽，阿萊一樣手執惡馬，第七場「鷹之團」，1000米直路賽跑到爛熟，矇住對眼都識跑，往績7冠3亞冇花冇假，唯一唔好就係要負重磅；第八場「大運財」，上季尾在冠軍一哩賽，與一眾年長馬同場，平磅跑到第五名，真係犀利，呢次由國際一級賽，轉到本地三級賽水平，級數點都有賺，隔晚睇WP賠率又唔係熱，抵博。