羅拔仔臨走踢好波 多蒙特「大」戰馬賽

猪拉多纳

歐聯分組賽F組上演德法「大」戰，多蒙特喺主場對馬賽，1.43倍入球大可以拎嚟做變倍器，因為「蜜蜂兵團」射手羅拔利雲度夫斯基，並冇因為事先張揚轉會拜仁而Hea踢，反而承諾會踢好每場波，以佢開季10場「7入球＋4助攻」嘅數據，有佢喺度都夠開大啦！

（開賽時間：周三凌晨2:45）
開季10場「7入球＋4助攻」

「羅拔仔」自爆1月過拜仁，的確幾乞人憎，不過佢啲隊友就唔覺係啲咩，依然合作得好開心，日前多蒙特喺聯賽主場以5:0大勝弗賴堡，「羅拔仔」同隊友合作貢獻咗2個入球、2次助攻，計埋德國盃同歐聯，今季佢上陣10場已經有7個入球同4次助攻，表現冇跌Watt，難怪佢夠膽大大聲講，離隊前唔會交行貨，反而會盡全力為多蒙特入波至走人！

不過咁，多蒙特前面入得嘅同時，後防又好牙煙，事關隊長基爾繼續養傷，中堅舒姆沙上星期打埋柴，門將維丹費拿今場又要坐波監，雖然馬賽都有射手基格納未好番，但最低限度都有前鋒皮耶、阿休兄弟同中場華布拿支撐大局，對住陣容不整嘅多蒙特唔似冇波入，既然係咁，兩隊駁火格當然係玩入球大最好。
歐聯F組