馬體會踩油做「大」騷

猪拉多纳

「無敵Mode」同波圖鬥攻

今晚葡超班霸波圖喺歐聯G組主場迎戰馬德里體育會，就算「床單軍團」有大紅人迪亞高哥斯達停賽，靠經驗搭救嘅韋拿同魯爾加西亞拍住上，仍然可以取代佢嘅位置，同主場超勁嘅波圖鬥攻。相信今晚肯定係一場精彩絕倫嘅對攻大戰，2.1倍入球大抵捧啦！

（有線63周三凌晨2:45直播）
紅人迪亞高哥斯達停賽

馬體會家陣可以話係入咗「無敵Mode」，除咗喺西甲開季7戰全勝創下隊史最佳開局外，仲連馬德里打吡嘅「不勝魔咒」都破埋，士氣肯定超級高昂，今場仲唔乘勢同波圖爭奪小組「一哥」咩！雖然大勇前鋒迪亞高哥斯達停賽，不過新援韋拿今季喺各項賽事已經入咗3粒，證明寶刀未老，魯爾加西亞亦都係可靠嘅攻擊手，梗係同波圖鬥攻啦！

不過論火力，波圖絕對唔會輸畀馬體會，佢哋今季喺主場4戰就入咗9球，主力前鋒積臣馬天尼斯同祖殊比斯基拉，今季亦已合力攻入9球，有佢哋壓陣就係「士哥」保證，就算10號仔祖安昆特路有啲唔妥，都夠本錢同馬體會死過。