薩克達地獄主場驅魔

猪拉多纳

曼聯頹爆 莫帥死板

歐聯A組重頭戲烏克蘭薩克達主場迎戰曼聯。薩克達主場惡氣夠，上屆面對車路士、多蒙特都唔使輸，相反紅魔鬼剛喺聯賽主場不敵西布朗，遭逢滑鐵盧，喺信心受挫嘅情況下作客此組最強對手絕對唔易啃，薩克達讓平半，上盤博得過。

（有線61及201台周四凌晨2時45分直播）

曼聯首輪分組賽主場擊敗利華古遜，但贏波過程唔算輕鬆，如果唔係靠射手尹佩斯喺被追和一比一後，一記神來之筆嘅倒掛勾射火速再度領先，紅魔鬼或會陷入苦戰。曼聯新帥莫耶斯喺人腳調動方面欠缺靈活，中路防守長期依靠里奧費迪南或尼曼查維迪，要知道兩人年事已高，近年水準早已大不如前，上場聯賽連西布朗嘅施斯隆、艾馬菲達奴、比拉希奴都可以反轉紅魔防線，今場薩克達嘅進攻球員更具卡士，紅魔要保住不失難度更高。
薩軍巴西兵有料到

薩克達首輪分組賽作客擊敗皇家蘇斯達，目前三分在手，肯定係曼聯爭取首名出線嘅最大勁敵，而且佢哋主場演出向來有保證，上屆分組賽連淘汰賽四次主場出擊只曾一敗，不過當時只係喺穩奪出線權情況下輸畀祖雲達斯，強如前屆冠軍車路士、上屆決賽分子多蒙特嚟到薩軍嘅頓巴斯競技場都冇甜頭，加上陣中幾名巴西外援雷斯阿祖安奴、泰臣巴些路斯、杜格拉斯哥斯達、班納特安尼斯奧有技術、有速度，機動踢法足以恰死紅魔鬼，主隊小讓平半捧得過。