祖記打醒精神掃雷

猪拉多纳

想喺足球菠菜贏錢，最好玩即場投X，睇過球隊臨場演出對唔對辦，再作下注決定，可大大提升命中率。歐聯首輪分組賽，B組祖雲達斯作客狂攻哥本哈根，但只係隔靴搔癢，比賽期間不斷有資金湧入主隊下盤及細盤，順利開出，大戶收穫甚豐。祖記今輪主場鬥加拉塔沙雷，唔可以再怠慢，必加多幾錢肉緊爭勝。客軍近況差，兼由「歐聯黑腳」文仙尼接手執教，雙重不利因素影響，情況悲觀。普遍莊家開祖記讓球半，照捧上盤。

（有線63台周四凌晨2時45分直播）
「歐聯黑腳」文仙尼唔掂

祖雲達斯上輪全場有近30次射門，但存輕敵心態，最終僅逼和哥本哈根1比1，令唔少散戶中招。不過呢支意甲班霸始終有質素，經過首輪意外失兩分後，今仗肯定打醒十二分精神。普遍莊家都睇好祖記打開勝利之門，讓球半，歐聯賽事來講，盤口相當辣，充分凸顯兩軍勝算處於非常懸殊情況。

土耳其球隊加拉塔沙雷今季表現不濟，連過往「地獄主場」威力都蕩然無存，上輪1比6慘敗畀皇馬。會方日前聘請文仙尼執教，但呢位意大利籍教練屬於「門口狗」，過往帶國際米蘭及曼城捧過聯賽冠軍，但去到歐聯一敗塗地。加上剛上任，仍需時間摸索，今仗幫唔到加拉塔沙雷解困。