恆大「柏」心口炒多鋪

猪拉多纳

揸住3粒主場都要威

中超班霸廣州恒大（足智彩譯FC廣州）今晚會喺亞冠盃4強次回合，主場迎戰日職代表柏雷素爾，恒大靠住一條超級南美鋒線，可以話係遇神殺神、遇佛殺佛，就算已經喺首回合作客大勝4:1，今場為咗喺主場球迷面前威番鋪，肯定唔會放軟手腳，一於力捧1.85倍「讓主」啦！

（now671台周三晚8:00直播）

恒大首回合以4:1大炒柏雷素爾後，入決賽可以話十拿九穩，但小妹覺得佢哋今場唔會因為咁放軟手腳囉！今次佢哋返到主場，唔踢得好好睇睇，又點對得住辛苦撲飛嘅球迷先？仲有呀，主帥納比講明唔會當球隊晉咗級，即係落柯打叫恒大球員全力以赴踢好今場波啦。

事實上，「南美3寶」孔卡、穆里奇同艾傑臣包辦咗近4場亞冠盃13個入球入面嘅12球，火力可謂冠絕亞洲，佢哋上仗聯賽休戰，有十足狀態應付今場，加埋郜林呢班「高質土炮」，再次大勝根本冇難度。
柏雷素爾無故取消操練

柏雷素爾雖然提早咗3日抵達廣州備戰，但佢哋唔止喺上一輪日職精銳盡出，完全冇為今場留力，而且抵達廣州後更無端取消操練，似乎唔係太有心去贏呢場波，加埋隊長大谷秀和停賽，主力後衞增島龍也亦都有傷唔出得，想唔輸鑊甘都幾難喇！
首回合：廣客勝4:1