馬拉加「爛地」搵奧沙開餐

猪拉多纳

祖亞昆、艾斯高、杜拿蘭、迪米捷利斯同教練比歷連尼統統跳船，但又有邊個估到馬拉加仲撐得住吖？呢班波開季表現硬淨，已經足足成個月未輸過，今晚喺「爛地主場」恭候天殘地缺嘅奧沙辛拿，擺到明係大炒格，2.28倍「讓主」捧得過。

（開賽時間：周六凌晨4:00）
奧沙辛拿傷兵滿營

據《馬卡報》所講，馬拉加個羅沙列達球場爛到飛起，踢埋今晚場波就會重鋪草皮，但查實西班牙傳媒話塊地喺休季期間已經係咁爛，所以有陰謀論指會方係特登整爛塊地，玩殘作客球隊。姑勿論馬拉加係咪出奸招，佢哋今季主場出擊真係好鬼惡，主場對住華歷簡奴同艾美利亞分別派蛋贏5:0、2:0，就算8月底鬥巴塞亦只係僅負0:1，證明爛地球場嘅威力唔講得笑！

馬拉加教頭舒斯達賽前收到壞消息，就係攻擊中場波比利安達臣右膝受傷未必出得，不過法蘭斯高樸迪路已告傷愈，相信影響唔會太大。反而奧沙辛拿就勁大鑊，除咗有中場艾華路施祖度停賽之外，仲有前鋒連奴、中場洛爾、羅拔圖托利斯同守將米基爾法蘭奴大堆十字軍缺陣，以球隊開季7戰輸足6場嘅表現嚟睇，今場都係難逃大敗。