利華 拜仁爆入球「大」戰

猪拉多纳

雙方射手着晒火

德甲今晚爆發超級「大」戰，由利華古遜主場迎戰衞冕嘅拜仁慕尼黑！「三哥」利華喺希比亞帶領下愈戰愈勇，火力絕對唔比拜仁輸蝕，可惜對住勁旅條防線往往都頂唔住，同狀態慢慢冒升嘅拜仁惡鬥肯定上演入球騷，1.59倍入球大熱都照捧呀！

（有線61、64、201及203、中央5台周日凌晨0:30直播）
軍醫澄清同哥帥關係好

哥迪奧拿正式成為拜仁主帥啱啱夠100日冇耐，表現已經由一開始遭受質疑，到依家獲管理層大力支持，先有首席軍醫禾法特力證同哥帥關係勁好，澄清兩人喺對曼城前喺機場嘅所謂「爭執」，只係討論堤亞高艾簡達拿嘅傷勢，會長漢尼斯亦都喺拜仁上場大勝曼城、兼造出66%控球率及近9成傳球成功率之後，讚到唔停口：「我從來未見過咁精彩嘅足球，實在難以置信！」咁就證明融入「哥帥Style」嘅拜仁的確勁掂！除咗近3場勁入4球嘅湯馬士梅拿之外，洛賓同列貝利都踢到着晒火，絕對有能力入番利華幾粒o架。
利華後防對強隊例失波

利華古遜今季7場聯賽贏足6場，其中4場更至少有3粒進帳，全賴悉尼森姆同傑斯寧夠生性，呢兩位射手今季德甲已經分別攻入5球，今場肯定係拜仁防線嘅心腹大患。可惜利華條防線一對住強隊就「現形」，唔止喺史浩克04手上吞兩蛋，就連對住換帥後表現唔掂嘅曼聯都要失4球，入得又失得，對住拜仁仲唔開番場入球騷咩！