阿仙奴征伐西布朗

猪拉多纳

奧斯爾激活 重現無敵霸氣

今晚倫敦雄師3響炮，最有睇頭嘅一場首推係勇不可擋嘅榜首阿仙奴作客啱啱打贏曼聯嘅西布朗。沉睡巨人阿仙奴終於甦醒，10年前嘅「無敵兵工廠」似有重臨之勢，佢哋嗰股霸氣已經蓋過傷兵問題，神級中場奧斯爾更激活埋艾朗藍斯同基奧特，目前大軍處於顛峰狀態，今輪作客西布朗贏埋就可打破球會英超作客連勝紀錄，故肯定會全力爭勝，客W捧得過！

（now 622周日晚11時直播）
誓破作客連勝紀錄

阿仙奴喺03年5月至04年10月創出跨季49場英超不敗紀錄，被各界封為「無敵兵工廠」，至今唔少「廠迷」仍然津津樂道。10年過後，阿仙奴近期踢出難得一見嘅霸氣，自開咧戰不敵阿士東維拉後，佢哋聯賽連盃賽11戰錄得10勝1和，唯一一場和波係喺聯賽盃作客今場對手西布朗，當時「兵工廠」用咗大批副選如賓特拿及宮市亮等，最終都射贏12碼晉級，足見兩隊級數有差距。

目前阿仙奴仍有傷兵成籮，右閘沙格拿啱啱加入埋十字軍，箭頭禾確特、普多斯基、中場辛迪卡索拉、阿歷士張伯倫及戴亞比等全部抖緊。不過，「兵工廠」家陣踢出氣勢，進攻中場奧斯爾助攻停不了，艾朗藍斯踢到成個全盛時期嘅謝拉特咁，加上腳風好順嘅中鋒基奧特，問你點頂？阿仙奴已經錄得跨季聯賽作客8連勝，今戰再贏就可打破球會紀錄，一定唔會勒住啦！
西布朗再爆有難度

西布朗上場作客奧脫福砌低曼聯踢出今季代表作，幾個新兵如施斯隆、艾馬菲達奴及安尼捷比好使好用，呢個進攻鐵三角有啲料到，但佢哋上場只係對住轉身慢到冇朋友嘅曼聯中堅里奧費迪南，雲格實唔會重蹈莫耶斯嘅覆轍，肯定叫班守將埋身招呼敵軍幾個危險人物，故相信好難連續兩周都爆冷。另外，阿仙奴最近4次聯賽對西布朗全勝，依家班波勇態畢呈，有力贏多鋪！