遠藤發火非勝不可 飛腳半場搞掂櫪木

猪拉多纳

日乙已經殺到入直路，櫪木SC今日喺主場對大阪飛腳，唔似頂得住，事關飛腳剛啱失去榜首位置，全隊殺氣騰騰，日前嘅操練，更加連向來少出聲嘅隊長遠藤保仁都發火召開緊急會議，希望隊友生性，唔似歎慢板梗係撐飛腳開半場勝！

（開賽時間：周日中午12:00）
櫪木申請J1認證失敗升班無望

飛腳上星期喺主場以0:1不敵FC愛媛，榜首位置被神戶勝利船搶走，現時落後對方1分，不過要留意嘅係，季中分別回歸同加盟嘅前鋒宇佐美貴史同艾迪洛查，簡直喺日乙超晒班，暫時分別有10個同9個入球，而且飛腳喺首循環作客以3:0打沉櫪木，半場已經領先3粒，家陣火力更強博得過。

仲有呀，飛腳近4場有3次半場領先，今季35場聯賽有20次開出半場勝，講進攻火力唔需要為佢哋擔心，更何況櫪木有中場菅和範停賽，戰鬥力所餘無幾，而且佢哋連續第2年申請J1認證尋日畀人否決咗，即使攞到日乙冠軍都唔合資格升班，士氣唔慌好。日本傳媒仲話，飛腳隊長遠藤保仁日前打破沉默，罕有地操練前搵隊友開緊急會議，傾吓點解近排戰績下滑，咁有火，櫪木點頂呀？
日職大分三神率先降班

日職方面，包尾大幡大分三神尋日晏晝喺主場以0:2不敵大阪櫻花，踢咗28輪先得10分，正式宣布降班。三神近年陷入財困，被迫拋售主將，但對球會財政幫唔到幾多。上季佢哋爆冷殺上日職，都係靠市民同各界捐款減債，下季重返日乙角逐，隨時一沉不起。