C朗騷哥利葡軍顯顏色

猪拉多纳

喺歐洲區F組，由C朗孭飛嘅葡萄牙主場對以色列，C朗上輪鬥北愛爾蘭，大演帽子戲法，國家隊入球總數超越尤西比奧，但卻被呢位名宿揶揄佢淨係識喺弱隊身上入波。呢位好勝心極強嘅皇馬巨星內心自然不爽，今仗一定要做齣好戲，盡情數胡，令尤西比奧心服口服。加上葡軍要爭小組首名直接出線，冇失分空間，預料會狂攻以色列，捧「讓球主勝」。

（有線155台周六凌晨3時45分直播）

葡萄牙落後榜首俄羅斯一分，換言之，必須餘下兩仗全勝，仲要寄望俄軍失分，先至可以直接晉身決賽周。來到最後階段已經唔理得咁多，最緊要做好自己全取三分，慶幸C朗狀態弗爆，上仗西甲又入波，成為皇馬救世主。佢今年各項賽事總入球已達五十粒，仲多過美斯八球，以色列防線勢難招架。