葡萄牙喪攻顯顏「色」

猪拉多纳

C朗畀尤西比奧窒要出氣

葡萄牙今晚喺世盃外圍賽歐洲區F組主場招呼以色列，1.46倍「讓球主勝」熱都要追。現時葡萄牙以1分落後榜首嘅俄羅斯，為爭首名肯定搏命，更何況C朗打破尤西比奧國家隊入球紀錄後，竟然畀對方喪窒，為啖氣梗係要o趙多幾粒啦！

（有線155周六凌晨3:45直播）

今晚世盃外球星大晒冷，F組中嘅北愛爾蘭、盧森堡同阿塞拜疆已經篤定出局，由於得番兩輪賽事，以色列落後第2位嘅葡萄牙5分，即係今場唔贏即死，實力有限嘅佢哋焗攻更加隨時被炒起。事實上，C朗今場應該會實牙實齒打沉以色列，否則失分被俄羅斯拋開，就好可能又要踢附加賽至拎到決賽周入場券。

除此之外，C朗上個月對北愛爾蘭連中三元後，國際賽入球累積到43球，打破葡萄牙殿堂級球星尤西比奧嘅41球紀錄，當時C朗講咗句，刷新紀錄其實只係時間問題，點知老人家聽到後發晒爛渣，近日小氣到話，以前自己冇機會對弱隊，每球都得來不易，唔似得C朗有機會劏阿塞拜疆呢啲魚腩喎！
以色列想搏有心無力

既然係咁，今場C朗當然要證明實力啦，更何況佢趁美斯養傷，對利雲特入波後喺2013年有50個士哥，當中包括國家隊入6球，比起美斯嘅42球多一截，以佢要威嘅性格，入波當然係唔好畀佢停，就算葡萄牙有射手普斯迪加同左閘法比奧干查奧停賽，C朗咪踢埋佢哋嗰份囉，佢可能仲醒神呀！

對家以色列焗攻，想搏都有心無力，隊長班拿約被車路士放棄後冇班落，呢場又冇預佢，另外，外流球員包括前鋒賓沙夏、希密特、中場利簡同後衞拉米謝漢因為狀態或者傷患問題冇歸隊，大家認得嘅，可能只得喺英超搵過食嘅中堅賓希姆，各位唔係覺得，佢有料阻止C朗入波吓話？
世盃外歐洲區F組