水手大執位讓波好「流」

猪拉多纳

澳職新球季尋日正式開咧，今日即刻有場超級大戰上演，由中岸水手主場硬撼西悉尼流浪者，合演上季澳職季後賽總決賽翻版。上季喺總決賽飲恨嘅流浪者，趁住水手休季期間大換血，實力同默契都打折扣，絕對有能力復仇。流浪者受讓平半，安高捧1.8倍下盤！

（開賽時間：周六下午2:30）
流浪者簽「新維度卡」孭飛

水手喺休季期有多達5名正選離隊或退休，包括門將馬菲賴恩、後衞柏迪保、施雲斯域克、中場保沙歷及前鋒艾賓尼伊斯爾新季都唔喺陣中。雖則話佢哋主帥艾萊特搵番唔少高質素替補，但始終培養默契需時，更何況至為關鍵嘅門將位，由馬菲賴恩換上前FC悉尼門將列迪，隨時係弱點所在。加上中場重心麥堅治又要代表新西蘭踢國際賽，今場唔踢得，陣容大執位，即使有地利都唔係咁易贏波。

另邊廂嘅西悉尼流浪者，貴為上季常規賽冠軍，實力當然唔嘢小，最緊要係佢哋新季人腳變動唔多，而且仲有幾個重要收購，包括為防線買入史柏堤奴域，前線搵嚟有「新維度卡」之稱嘅杜米祖歷孭飛，實力絕對有所提升。其中最令人期待嘅杜米祖歷，佢係克羅地亞聯賽出身，有速度有射術，之前東亞盃佢就曾經入選澳洲國家隊射破日本大門，流浪者今季有佢以自由身加盟，真係執到寶o架！