阿聯西班牙化誓重拾「光輝」

猪拉多纳

今季睇「澳職」多咗份親切感，因為有香港傑志前教練甘巴爾去咗教阿德萊德聯吖嘛！相信唔少球迷今日都會分外關注「阿聯」喺澳職嘅第一擊，睇吓初試啼聲嘅甘巴爾點樣帶領呢隊上季常規賽四強分子。今日「阿聯」主場出擊對住防線散晒嘅珀斯光輝，呢位師承巴塞隆拿嘅教練大有機會盡情一顯華麗進攻足球，無論理智與感情，都係要撐2.08倍主勝啦！

（有線64周日下午2:00直播）
珀斯光輝球星四散

甘巴爾初到貴境，已經為「阿聯」引入伊沙亞斯同沙治奧施里奧兩名西班牙兵，澳洲傳媒對甘巴爾嘅「西班牙化」都好有期望，認為佢可以為球隊注入技術同悅目兼備嘅進攻踢法。連隊長加利高域賽前都出嚟話對新教頭嘅新踢法好興奮，成隊波耳目一新兼士氣高昂，加上主場出擊，絕對值得睇好啦！

對比主隊嘅煥然一新，珀斯光輝就黯淡啲嘞！臨開季前突然有後防主將米列斯域離隊，希法蘭又過檔西悉尼流浪者、愛爾蘭中場米拿就轉咗去布里斯班獅吼，突如其來嘅離隊潮，又的確搞到教練艾華士失晒預算嘅。依家就連新西蘭射手史美斯都因傷缺陣，珀斯光輝殘陣作客，開季第一場想有分落袋都幾難喇。
頂占筍盤：阿德萊德聯（主勝）