喀麥隆讓客夠嬴有「突」

猪拉多纳

世界盃非洲區外圍賽踏入最後嘅附加賽階段，今晚會有突尼西亞喺主場迎戰喀麥隆，雖然客軍近年喺國際賽戰績麻麻，但伊度奧終於同領隊「傾掂數」乖乖踢波，遇着換上荷蘭名宿告路爾做教頭嘅突尼西亞未必輸蝕，喀麥隆受讓一球，梗係捧1.58倍「讓客」啦！

（開賽時間：周一凌晨1:00）
伊度奧「傾掂數」歸隊

論星味同埋球員個人能力，作客嘅喀麥隆一定喺突尼西亞之上，除咗巴塞中場桑治、西維爾嘅麥比亞、阿積士攻擊手艾安安奧等球星之外，今次仲有早前「疑似退出國家隊」嘅伊度奧強勢回歸！呢位近年經常同喀麥隆足總作對嘅車路士前鋒，對於自己突然「復出」有以下騎呢解釋：「我接到一個偉大嘅任務，我會好似優秀嘅士兵咁完成工作！」點都好啦，只要佢唔再興風作浪擾亂軍心，真係有機會帶領班隊友扭轉近4仗輸兩場嘅頹勢，極有可能保不敗甚至贏波o架！

突尼西亞喺前領隊馬亞魯領軍嘅半年期間，戰績麻麻，不過都唔代表喀麥隆贏硬！皆因今場係佢哋換上新帥告路爾後首場賽事，呢位荷蘭名宿有一定功力，今仗分分鐘同對手鬥到難分難解呀！