葡萄牙細贏盧森堡 疊埋心水踢附加賽

猪拉多纳

F組俄羅斯同葡萄牙角逐首名直接出線資格，葡萄牙上輪遭以色列逼和痛失兩分，爭奪首名機會已微乎其微，王牌基斯坦奴朗拿度（C朗）臨尾攞黃牌疑「洗底」留力應付附加賽，缺少C朗嘅葡萄牙只係冇牙老虎，主場難炒盧森堡，中位數調至3.5球，建議捧細盤。

（有線155台周三凌晨1時直播）
C朗停賽「洗底」

葡萄牙上場由於門將魯爾柏迪斯奧末段犯錯，主場被以色列逼和一比一，現時佢哋落後俄羅斯三分，數字上雖然仲有機會後來居上，不過只要俄羅斯同時間作客唔輸畀阿塞拜疆，葡萄牙無論贏輸都只能取得次名。C朗上場末段「發老脾」踢走個波，累積黃牌夠數，同皇馬隊友比比今仗齊齊坐波監，表面上好唔理智，實則佢哋坐完今仗波監，下個月嘅附加賽兩回合都肯定可以上陣，預計其他隊友今仗都會避重就輕，唔會去得太盡，大勝機會唔高。