馬房秘聞:何良心急爭上岸

胜保罗

馬房秘聞:何良心急爭上岸
 
▲蔡明紹近期成為當紅炸子雞，好多練馬師及馬主都想將馬匹交畀佢一試，今戰佢就有五匹外線坐騎，當中包括胡「紅褲子」同「應變計劃」。噚朝收操後，胡森仲特登叫咗蔡明紹入馬房寫字樓，畀「紅褲子」近仗嘅出賽錄影帶佢睇，期間仲詳細講解呢隻馬的特性，兼分析同場對手實力。呢隻馬今季只係贏咗一場，好明顯仲未夠喉，今次搵蔡明紹減磅出戰必須留意。

▲早前韋達推騎「包裝大師」，搞到何良臨時臨急搵唔到其他騎師，最後呢隻馬易配賴維銘跑到三甲不入，其後未見何良與韋達再合作。

周日何廐四匹戰馬依舊未見韋達沾手，噚朝黎海榮就替「新威」及「福喜」主持最後試跑，其後亦替「盈駿寶」代課，至於「衝勁直前」則由勞愛德主試。呢幾駒操練期間，何良全程響烽火台睇實，其後收操返馬房，何良更響呢四駒嘅馬格前停留好耐，睇勻晒各駒食料情況，一班手足都話阿頭好少咁緊張，似乎有決心響今戰提早上岸。

大摩馬偉昌密斟

▲白德民停賽，最大的受益者係馬偉昌，今戰五匹摩廐馬之中，有四匹交由馬偉昌執韁。噚朝馬偉昌就親自替「常山鳳寶」、「天祿」及「經典再現」快跳，其後騎者更走上烽火台向大摩匯報各駒情況，騎練兩人密斟一大輪後先離開，可見呢路人馬今戰必有所圖。