「阿德」Tiki-Taka爭取「勝利」

猪拉多纳

前傑志教頭甘巴爾今季空降澳職，將阿德萊德聯打造成「澳職巴塞」，開鑼戰就將「Tiki-Taka」發揚光大，踢少兩件都照贏珀斯光輝3:1，個頭開得咁好，相信墨爾本勝利唔會係佢哋手腳，「阿德」主場讓平半要上盤。

（有線64周五下午4:30直播）

自從阿德萊德聯今季改由「甘仔」揸旗後，踢法真係唔同晒，就講上輪聯賽贏光輝場波吖，「阿德」全場有311次成功傳送，就算末段有伊沙亞斯同保加特被逐，呢班波一樣貫徹「Tiki-Taka」嘅控球在腳作風，加埋上仗梅開二度嘅阿根廷前鋒摩拉利斯紐曼質素超班，使驚「阿德」冇波入？

對家勝利進攻雜亂無章，上仗主場鬥雄心佔盡上風，但明顯冇入波板斧，中堅柏保路干查拉斯今日又要坐波監，澳洲足總仲斟緊普斯迪高路，呢位勝利主帥亦表示有機會掌「袋鼠兵團」帥印係光榮，大佬準備跳船，唔影響士氣就假咯，今鋪造訪「阿德」想唔輸都難！