扭計加人工 朗尼爆騷 紅魔讓球勝揀得諾

猪拉多纳

英聯盃16強另一戰曼聯主場迎戰諾域治，有傳「紅魔」王牌朗尼喪屈球隊加人工續約，年薪將僅次於打工皇帝C朗，既然夠膽獅子開大口，佢梗係要做番啲嘢證明自己，遇上質劣態沉嘅「金絲雀」，仲唔係「魔童」騷哥利嘅好時機，強捧讓球主勝。

（TVB 13及now 818周三凌晨3時45分直播）

雖然新帥莫耶斯帶領曼聯成績差強人意，但王牌朗尼依然交足貨，唔單止士哥頻頻，其所扮演核心角色完全主宰球隊嘅進攻，佢恃住自己嘅重要性，喪屈球隊同佢續一份年薪高達1.76億港元嘅新合約，只係比足壇年薪第1嘅皇馬球星C朗略低，近日又爆出如果紅魔唔應承，佢就會喺1月投奔車路士。當然唔可以嘢嘢都硬碰喇，更何況朗尼本人傾向留番喺奧脫福球場，最好方法係用表現說服高層加人工。
諾域治留番啖氣護級

諾域治實力明顯差紅魔成條街，近6仗又輸4場，士氣認真麻麻，加上心繫聯賽護級，諾域治邊有心機喺盃賽發圍呀，立功心切嘅朗尼可趁機予取予攜，讓球主勝捧得過。