馬體會開火搶半場W

猪拉多纳

「迪哥」飛起巴西披鬥牛戰衣

今晚四場西甲快車，氣勢如虹嘅馬德里體育會作客CF格蘭納達。馬體會射手迪亞高哥斯達表明心迹，選擇代表西班牙而唔揀巴西，為騷「哥利」今仗定必施展渾身解數，加上另一力爭重返國家隊嘅前鋒韋拿近期亦重拾射門鞋，馬體會客W冇難度，求好分揀埋半場客勝。

（now 632周五凌晨3時直播）

迪亞高哥斯達今季10場聯賽射入11球，已經趕過美斯進佔射手榜首位，早前巴西、西班牙都表明有意徵召佢入國家隊，盤算一輪日前迪亞高哥斯達終於開腔叫巴西死咗條心，表明自己首選係代表西班牙，而且最快有機會喺11月嘅國際賽檔期上陣，嚟緊比賽一定會盡情數胡證明自己身價。

不得不提仲有迪亞高哥斯達嘅好拍檔、今季由巴塞過檔嘅韋拿。雖然韋拿早前一度經歷八場入球荒，狀態惹外界質疑，好彩呢位鬥牛國箭頭上輪對貝迪斯起孖，亦係佢25個月嚟首次一場省兩粒，對於一名前鋒嚟講，入波就係重拾信心嘅最佳靈藥，今場當然希望延續佳態。
CF格蘭納達啞火頂唔住

相反，CF格蘭納達最大問題係前線啞火，之前8場入得4粒，今場正路會守住先；但所謂久守必失，佢哋點頂得住弗到爆嘅「迪哥」同韋拿連番衝擊吖？馬軍教頭施蒙尼今仗必定想速戰速決，半場客勝有2.02倍值得留意。法達斯維