車仔強勢紐卡素難招架

猪拉多纳

有乜嘢比六連勝更高興？梗係七連勝啦！車路士聯賽連盃賽直落贏六場，今晚喺英超頭場作客紐卡素，教頭莫連奴上次帶「車」期間三次去到聖占士公園未嘗一勝，今次夫添重臨「凶地」殺聲震天，大有不勝無歸之勢，熱捧客Ｗ！
莫帥誓破聖占士公園魔咒

莫連奴領軍多年客場征戰贏波無數，但喺聖占士公園仲未開齋，佢04至07年三次帶領車仔造訪紐卡素只錄得兩和一負，戰績慘淡，真係講都冇人信！不過，莫帥今次重返車仔坐擁超強兵力，上場輪換十人照樣作客搞掂阿仙奴，現時隊中除咗中場雲堅基爾要長抖外，其餘主將都可候命，分拆兩隊出都得，真係超勁！

相比之下，紐卡素兵源有限，上場盃賽鬥曼城用咗唔少主力，最終搏足百二分鐘輸波出局，身心受創。「喜鵲」防線仲出現傷兵潮，杜密特、希達拉及賴恩泰萊無緣披甲，一對中堅高洛仙尼及史提芬泰萊都有傷在身，情況都幾壞，撞啱車仔進攻主力夏薩特及費蘭度托利斯等人近期紛紛回勇，紐卡素實在難以招架。