拿玻里四人防線好形細

猪拉多纳

保羅簡拿華路一直係拿玻里後防中流砥柱，不過佢最近突然失寵，原因係得罪老闆。新加盟嘅希古恩喺8月尾跟「細簡」遊船河，仲玩跳水成個頭撼落大石，拿玻里會長迪羅倫迪斯見到呢位貴價貨騎呢受傷肉都赤埋，就遷怒於身為隊長嘅「細簡」，鬧爆佢要為希古恩嘅受傷負責，雖然及後補飛話兩人關係良好，但件事冇咁簡單。

正所謂一朝天子一朝臣，由於主帥賓尼迪斯不嬲踢開四人防線，「細簡」則習慣出任三中堅之一，唔係好啱踢喎，於是「肥賓」借老闆之手整走呢位忠臣。最重要係自從中堅用咗艾比奧爾夥拍費達歷高費南迪斯之後，拿玻里喺聯賽只失七粒，僅次於榜首嘅羅馬，後防穩陣咗好多，睇番佢哋近三次喺歐聯前夕嘅聯賽均開細盤，今晚對住作客曳爆嘅卡坦尼亞，「肥賓」隨時又慳水慳力小勝算數，入球細抵玩。

（周日凌晨3時45分開賽，馬會網上文字直播）