韋達連環走寶

猪拉多纳

韋達揀馬眼光向來有一手，所以佢推騎嘅馬，機會通常都會被人睇低一線。雖然話冠軍騎師都有睇漏眼嘅時候，但點都估唔到尋日沙田日賽韋達竟然走寶三次咁多，「環保之星」、「嫡愛」同「輕彈錢笑」三匹佢上次騎過嘅馬，今鋪易配全部立即勝出，認真慘情，若非如此，隨時喺停賽前一期執番幾W，唔使被潘頓拋離咁遠。
       
第二場T派20萬

當中，第二場贏馬嘅「環保之星」益咗下家蘇狄雄，爆出17倍冷門獨贏，同亞軍「新界福星」及季軍「神幻金剛」構成$203,484三重彩，韋達揀騎嘅「比你高」，3.8倍大熱門只跑梗頸四。賀賢昨日正身在澳洲，準備出席墨爾本盃巡遊活動，未能在場督師，但佢都能遙距贏馬，替「環保之星」打開勝利之門。馬主杯莫停團體經理人鄺啟明表示，呢匹馬血統比較慢熱，遲遲未開齋可以理解，但上場落五班已有接近走勢，因此賽前已有一定信心。