紐倫堡隊長畀球迷鬧到摔臂章

猪拉多纳

德甲慕遜加柏主場對紐倫堡，兩軍狀態各走極端，慕遜加柏愈戰愈勇已經殺上聯賽榜第四位，面對態沉士氣低落嘅紐倫堡有力大勝一仗，黑柴撐讓球主勝。

慕遜加柏上輪贏漢堡2比0，取得今季首場作客勝利，中場大將艾蘭高話對球隊係一大突破，對全隊信心大幅提升，相信今季會有一番作為，事實上佢同麥斯古斯、靴爾文及新加盟嘅拉菲爾基達奴組成極銳利嘅攻擊組合，加上門將達史特根愈戰愈勇，已經成為西甲巴塞隆拿嘅獵物，球隊攻守實力都咁強，佢哋係今季主場未逢敵手，聯賽五戰全勝，每仗最少都贏對手兩粒，今晚都唔會留手。
作客慕遜加柏聽炒

紐倫堡就大鑊，今季仲未開齋，雖然經常話新官上任三把火，但佢哋嘅新帥華碧克帶來嘅只有一點火屑，前仗首度領軍賽和咗史特加，但上仗主場竟然慘吞另一弱旅弗賴堡三蛋，効力球隊十年嘅隊長門將舒希化賽後向主場球迷致意時，受到己方球迷柴台、謾罵同不禮貌對待，令佢憤然將隊長臂章摔喺草地，目前士氣差到咁，又邊度係慕遜加柏對手？