禾夫斯堡踩扁小蜜蜂

猪拉多纳

德甲今晚有近況大勇嘅禾夫斯堡主場迎戰疲兵多蒙特，「狼堡」大有機會全取三分！佢哋喺聯賽一口氣3連勝彈上到第5位；相反多蒙特啱啱喺歐聯苦戰下輸波，今場要繼續作客，「蜜蜂兵團」隨時陰溝裏翻船，「主勝」值得一博！

（有線64及203周六晚10:30直播）
狼堡麥斯美艾洛特大勇

禾夫斯堡近期走勢唔錯，連贏3場，19歲新星麥斯美艾洛特又喺呢3場都有波入！所謂「人逢喜事精神爽」，球會早前宣布同後防馬素舒希化續約到2017年，仲保證約滿後會安排一個球會職務畀佢添。連個夥計退役後嘅生計都照顧到，球員自然甘心為隊波賣命啦！

論實力，多蒙特當然喺禾夫斯堡之上，不過佢哋近排連場硬仗，周中歐聯0:1輸畀阿仙奴後，出線形勢又再有啲危險！最壞消息係王牌羅拔利雲度夫斯去意已決，證實1月份轉會市場重開，就係佢離隊尋求新挑戰之時，呢個消息對軍心肯定造成打擊，加上今場疲兵再戰，實在隱憂重重。
頂占筍盤：禾夫斯堡（主勝）