Team字冇I從小做起

猪拉多纳

兩年一度嘅世少盃啱啱落幕，睇開波嘅球迷都會發現，一些傳統足球強國如英格蘭、德國、荷蘭等統統冇影，四強中除咗阿根廷之外，尼日利亞、墨西哥及瑞典均非傳統勁旅，證明足球係圓嘅。Peter今年先後睇過世青盃及世少盃，由於現時通訊發達，只要你有心，好多世界各地先進嘅訓練及戰術，都可以搵到作為參考，藉此拉近各國之間嘅水準差距。
中港青訓須「放下身段」

Peter覺得要建立一個健全嘅青訓制度，首先要有好教練，為年輕球員灌輸正確嘅足球知識，尤其係戰術意識，當然亦要為佢哋打好技術方面嘅基本功，最後要一班小將意識到整體合作嘅重要性，因為Team（球隊）字係冇I（自我），若果唔識得放低自我為全隊服務，就算你幾好波都冇用，加上長期訓練日子有功，你便睇到今屆尼日利亞、墨西哥及日本嘅U17球員，打出猶如巴塞式地面傳控踢法。由於小將好似一塊璞玉，需要時間琢磨，切忌揠苗助長、喺佢哋心志未成熟時提拔做大國腳，需要按部就班慢慢嚟。

當下中國及香港資源豐富，只要願意付出人力物力專心搞好青訓，並且放下身段，向其他足球強國取經，吸收更先進嘅戰術體系及訓練模式，絕對可以提升年輕球員嘅水準。