長人+野獸發火 撐祖記贏「玻」

猪拉多纳

意甲重頭大戰Kick Off！

今晚意甲爆發重頭大戰，由衞冕冠軍祖雲達斯主場迎戰拿玻里！「斑馬兵團」條防線近排回穩，加上「長人」洛蘭迪回勇，有佢同「野獸」泰維斯拍住上，絕對可以射爆傷兵成籮嘅拿玻里，1.62倍主W趁熱食啦！

（TVB 301及中央5台周一凌晨3:45直播）
拿玻里一對主力守將打柴

祖雲達斯出名穩陣嘅後防早排經常「甩轆」，好彩依家已經回復昔日水準，近4戰除咗上仗歐聯對皇馬無可避免地失咗兩球之外，就再冇失過波。更好嘅消息係「斑馬兵團」除咗有近4戰入3粒嘅維達爾，同泰維斯都可以穩定地取得「士哥」之外，就連狀態沉咗一排嘅洛蘭迪亦翻生，連續兩場歐聯對皇馬取得進帳，證明呢位「鬥牛勇士」終於回勇，咁多位攻擊手合力，要砌低拿玻里唔係咩難事。

拿玻里喺新帥賓尼迪斯帶領下表現大躍進，近排更取得5連勝，希古恩同荷西卡利祖兩位射手狀態亦唔錯，但佢哋嘅致命傷係防線人腳差，就算點進步仍然都係唔穩陣，更大鑊係佢哋一對守將辛尼加同比圖斯齊齊打柴，搞到賓帥要臨時臨急簽件自由身嘅雷維李尼頂檔，要知道呢位前法國國腳已經34歲，點靠得住呀？而且拿玻里近6仗得1場保得住清白身，上仗對住鋒力唔算太強嘅馬賽都要失兩粒，今仗造訪級數高一大截嘅祖記，睇怕唔會再有運行喇。