墨西哥信心爆棚

猪拉多纳

飛起大牌土炮砌新西蘭

另一場世盃附加賽首回合由中北美洲第四名墨西哥主場鬥大洋洲冠軍新西蘭。墨西哥領隊米基爾靴里拉今次棄用查維亞靴南迪斯、杜斯山度士等歐洲外流球員，改以本土兵出戰，明顯對呢班土炮充滿信心。新西蘭球員質素及平均技術難登大雅之堂，波童捧讓球主勝。

（周四凌晨4時30分開賽）

墨西哥過去兩個月曾四度易帥，最新上任嘅教頭米基爾靴里拉可謂膽識過人，今次竟然冇徵召查維亞靴南迪斯、杜斯山度士、古亞達度等効力歐洲球會嘅大牌球星，改用全土炮應戰。據報由於米基爾靴里拉一向推崇左右翼衞陣式，主攻時踢「352」，防守時就變為「532」，呢種踢法最講究就係要球員走上走落，好考體力，所以米基爾靴里拉把心一橫，決定重用紀律性較強嘅本土球員。呢班「新兵」喺最近兩場非正式熱身賽先後擊敗芬蘭及一支國內乙組球隊，兩仗合共攻入八球，證明一樣有料到。
馬基斯為墨西哥派定心丸

另外，墨西哥隊長馬基斯雖然已年屆三十四歲，但仍係球隊嘅中流砥柱，幫墨西哥上陣超過100次，大賽經驗非常豐富，墨西哥有佢助陣，班隊友都踢得定啲啦﹗

新西蘭陣中雖然都有唔少大家熟悉嘅名字，例如効力澳職珀斯光輝嘅前鋒史美斯、李斯特城箭頭基斯活特及史特加中場馬高洛查士，可惜其他球員質素平庸，整體實力難和墨西哥相比。為免夜長夢多，相信墨西哥會盡力數多幾粒，以免下周次回合有任何差池，1.62倍「讓球主勝」可捧。