撐克羅地亞強勢破冰

猪拉多纳

克羅地亞擺平「史迪馬之亂」，現由高華兄弟掌權領軍，今次於世界盃歐洲區附加賽作客惡鬥冰島，大軍雲集國內精銳部隊，將重現士氣，加上球隊級數根本在冰島之上，踢番8成水準作客都夠殺，小讓平半要上盤！

（周六凌晨3時開賽）
高華兄弟重整軍容

史迪馬上年7月接掌克羅地亞，帶到班波不倫不類，世盃外最後4輪僅得1分，包括兩負頹爆嘅蘇格蘭，搞到要踢附加賽。史帥知衰呈辭，各界對其評價超負面，甚至有人形容佢係國家隊史上最垃圾嘅教頭！克國足總搵咗高華兄弟救亡，大佬尼高高華坐正，羅拔高華從旁協助，兩人今年初接掌克國U21帶得有聲有色，民望甚高。

經過「史迪馬之亂」後，高華兄弟銳意為國家隊注入新血，呢次帶同3個U21愛將出征，包括守將維沙積高、中場高華錫及箭頭列比錫被視為國家隊未來重心，無論今仗有冇得落場，都可感受大戰氣氛，對將來發展有好大幫助。加上克軍仲有星級指揮官莫迪歷、超級射手文迪蘇傑及老牌前鋒奧歷等猛將，要活力有活力，要經驗有經驗，條件四正。
冰島大賽經驗輸蝕

冰島於瑞典有料教頭拿格碧克帶領下愈戰愈勇，殺入附加賽查實已係超標完成，球隊以熱刺進攻中場基菲爾施古臣作進攻重心，前線由阿積士高產前鋒史基賀臣擔大旗，仲有前車路士老牌射手古莊臣及現時荷甲射手榜No.1箭頭艾費特芬保加臣，火力唔弱。不過，去到生死大戰經驗極重要，冰島空有鬥志，但輸經驗，踢落好蝕底，受讓都信唔過。