A山衰多口三獅兵(o趙)智利報仇

猪拉多纳

交戰前夕最忌出言嘲笑對手，咁做只會激起敵人鬥志。偏偏智利翼鋒阿歷斯山齊士就唔收口，喺球隊聽朝作客同英格蘭踢熱身賽前，大彈「三獅兵」冇料難攞世界盃，更暗寸對手係少爺兵，相信英格蘭一班球星已經燃起戰意，急不及待要贏波反擊，1.87倍主勝要追。

（now621台周六凌晨4:00直播）
英格蘭謝拉特 基爾獲加缺陣

A山齊士賽前接受《每日快報》訪問，直言英格蘭唔夠班挑戰一眾列強爭世界盃。之後又講自己細個為咗買對波砵，要幫手洗車搵錢，唔似英格蘭球員咁幸福，入到大球會做青年軍就有齊裝備，明寸佢哋似足一班少爺兵未捱過。咁唔畀面，肯定激到一眾英格蘭球員咬牙切齒。

雖然「三獅兵」中場謝拉特同右閘基爾獲加休戰，不過佢哋仲有復勇嘅朗尼掛帥，配合要爭取表現，趕上「尾班車」入選世盃大軍嘅鋒將積洛迪古斯、拉爾拉拿、安祖斯唐辛等人，在公在私都會搏盡砌低智利。而且智利中場維達爾缺陣，勢必影響球隊攻守效率，英格蘭今場主勝可期。