波斯尼亞半個主場受讓抵捧

猪拉多纳

阿根廷聽朝去美國聖路易斯市布舒球場同波斯尼亞拍跳，要知道聖路易斯有超過7萬名波斯尼亞裔移民喺度，幾乎等於主場出戰，以阿根廷嘅Hea踢態度，波斯尼亞有本錢偷雞，阿根廷讓波？捧2.2倍「讓客」着數啲！

（開賽時間：周二早上9:30）
阿根廷Hea踢 大後備把關

喺世盃外歐洲區G組力壓希臘首名出線嘅波斯尼亞，近年出產咗包括伊比斯域、迪斯高同米斯莫域等頂級球星，其中伊比斯域仲要係喺聖路易斯讀大學兼踢過NCAA，自然深得當地人歡心。呢隊波之前喺世盃外以3連勝衝線，依家熱身賽即刻硬撼勁旅阿根廷，主帥蘇錫話明會全力求勝望增強球員信心，夠鬥志信得過。

對面嘅阿根廷擺明等緊決賽周來臨，場場Hea踢，上周六熱身賽對厄瓜多爾都只能交白卷。領隊沙貝拉又話明今場波會作出6至7個調動，阿古路有望回歸正選，但上仗搏完嘅希古恩同迪馬利亞未必落場，喺摩納哥淪為大後備嘅羅美路就會披甲把關，要知道佢平時上陣唔多狀態成疑，點靠得住呀？