曼城無力拔刺

猪拉多纳

新兵未夾 支柱養傷

今夏均洗腳唔抹腳嘅兩支英超球隊今晚碰頭，曼城主場對熱刺，曼城今仗缺少咗攻守兩員大將大衞施華同高柏尼，實力大受影響，反觀熱刺雖然都係冇咗進攻核心基斯甸艾歷臣，但球隊中場人手充裕，影響唔係好大，今仗受讓秤先，捧讓球客勝。

（now 621周日晚9時30分直播）

曼城今個夏天買咗尼格度、捷西斯拿華斯、祖維迪等多名星級戰將，以為球隊實力會大增，點知佢哋仲未完全融入球隊，搞到曼城仍要靠舊有一班骨幹如大衞施華、耶耶托尼、高柏尼同阿古路等苦苦支撐住，一冇咗是但一兩個，有如樹倒猢猻散，就好似中堅高柏尼今季成日受傷，冇咗呢名防線支柱曼城失波勁多，對卡迪夫城、阿士東維拉呢啲中下游球隊都輸3比2就知球隊防守廢咗幾多。

防守冇咗高柏尼，今仗進攻亦冇咗施華，呢位中場大腦上仗對新特蘭已經因傷缺陣，前線冇咗佢攻力即刻廢晒，前鋒阿古路幾弗都冇用，對住「黑貓」 早早失波都扳平唔到就知曼城冇咗施華攻力差幾遠，今仗施華繼續養傷缺陣，曼城好難攻得入防守穩陣嘅熱刺。
熱刺作客以穩為先

熱刺今夏買人亦同樣冇手軟，尤其係買咗好多中場球員，例如荷西保連奴、拉美拿、基斯甸艾歷臣等，加埋本身已有一大批中場，好似辛度雲尼亞里、安祖斯唐辛、迪比利、艾朗連儂等，中場多到數唔晒，所以今仗冇咗基斯甸艾歷臣都唔怕，大把人排住隊等上陣，實力不減。再加上領隊保亞斯深知今仗要作客，唔敢作出太大變動，都係以穩字行先，呢個戰術最適合防守力強嘅熱刺，今仗受讓值捧。