AC衰到貼地些路迪W得

猪拉多纳

歐聯H組些路迪主場對ＡＣ米蘭，ＡＣ近排衰到貼地，已連續7場正式賽事不勝，上仗意甲賽後更遭球迷包圍，民心已經盡失，些路迪主場硬淨，連巴塞都未驚，更加唔赦沉淪中嘅ＡＣ，一於直取3倍主勝。

（周三凌晨3時45分開賽）
阿里基巴神無心戀戰

ＡＣ上季靠巴洛迪利大發神威，勉強取得歐聯席位，但「巴神」已經變番凡人，自上月初歐聯對阿積士射入12碼後，就未曾再為ＡＣ入波，上仗聯賽對熱拿亞，仲射失埋12碼。「腦殘」出名ＥＱ低，恐怕短期內難走出逆境，近期傳出ＡＣ想賣走佢，預計佢更加唔會為球隊賣命。至於阿里基亦可能教埋今場就冇得撈，將帥都無心戀戰下作客蘇格蘭，憑乜同人鬥？

些路迪首輪作客ＡＣ踢到82分鐘先至擺烏龍失守，表現唔失禮，今仗返主場絕對有力報仇。些路迪上季歐聯主場贏過巴塞，今季再鬥巴塞，喺近半場時間打少個下都只係小負0比1。些路迪落後次席ＡＣ只係2分，換言之贏到今場「6分波」，就可以超前對手，主隊眾志成城，有力擊敗呢支意甲中衰豪門。