皇馬勢斬華拉度列

猪拉多纳

「BBC」着晒火+艾斯高回勇

今晚西甲皇馬主場火併華拉度列，依家「銀河艦隊」前線「BBC」加里夫巴利、賓施馬及C朗全部着火，近6場怒轟20粒，大有遇神殺神之勢，近期連金童艾斯高亦有復甦迹象，全民皆攻下勒都勒唔住，實玩到態沉嘅華拉度列陀陀擰，就算讓到2球咁辣，斯維都照捧讓球主勝。

（now 632周日凌晨3時直播）

C朗對皇馬有幾重要唔使多講，周中歐聯佢因傷缺陣，但「大聖爺」加里夫巴利一樣咁掂，自主帥「肥安」安察洛堤重新安排佢喺右路，完全將呢位天價飛翼嘅潛力發揮晒出來，其用速度硬爆對方後衞易過食生菜，近6仗入5粒兼5次助攻，合共為球隊製造咗10個士哥，殺傷力唔差得過C朗。

事實上加里夫巴利、賓施馬及C朗嘅「BBC」三叉戟愈來愈夾，自國家打吡輸畀巴塞後，皇馬喺之後6場波狂轟26粒，場均入逾4球，其中「BBC」則佔咗20球，數據非常恐怖。至於今夏從馬拉加來投嘅艾斯高，之前因征戰太密，搞到狀態跌晒Watt，好彩安帥適時畀佢抖抖回氣，令呢位西班牙新金童慢慢上番力，佢嘅串連能力，為「銀河艦隊」注重速度嘅進攻加添技術元素。
主場讓兩粒濕濕碎

相反華拉度列頭頭碰着黑，尤其係後防極度唔集中，經常輸大意波，今仗除主力域陀佩雷斯、奧斯卡干沙里斯因傷倦勤外，連中場核心艾拔都要坐波監，估計佢去到巴拿貝連還手之力都冇，隨時畀「BBC」予取予攜，皇馬讓兩球濕濕碎，讓球主勝好穩陣。