同個夢想施回馬槍

猪拉多纳

　　今日賽事真係唔易度，咪以為潘頓獨大就好易買，佢都係人一個，唔識飛天，唔曉遁地，有餐士馬喺手，贏到好正常，如果坐騎實力唔夠，佢都唔會幫到好多。所以，有時菠菜係要跟紅頂白，但唔代表盲目跟風，必須動腦筋諗真。

　　第一場四班1200米草地。「好加加」1000米追得好，加程至1200米，更加有走勢，但唔好以為跑長二百米一定會好，好多馬直路賽後上勢強，一加程即撞板，原因好簡單，兩項路程嘅賽事環境大不同，所以，呢匹馬成績有進步，其實好有難度。

　　好加加搵啱出路

　　「好加加」已經搵啱出路，今仗繼續跑同一路程，只要冇啲不明物體攪攪震，有力補中。

　　第四場三班1000米草地。「輕彈錢笑」上次阿棟已經好鍾意，正如賽前所講，傳出有腳傷，又試過缺席操練，係就係有條刺，諗深一層，未好番，阿蔡唔會夾硬跑，結果贏來話咁易，仲勁過上季贏四班嘅時候。賽後重手被加12分，係就係難啃啲，質素搭夠應該冇問題，如果因為在直路賽排內檔令到賠率降溫，獨贏有3、4倍的話，我實會打佢主意。

　　第十場三班1400米草地。「同個夢想」在三班實力強，預言遲早在二班有可為，關鍵係大摩心態，有冇決心谷隻馬上去。「同個夢想」輸完上一場，呢次搵阿俊仔，減低外界注意力，肯定會比起用洋將好分得多，而宏觀今場對手，實力似是而非，博佢今場施回馬槍，有本事「食」得晒。

　　（陳華棟 資深評馬人）