多蒙特生牯仔夠炒沙貝魯根

猪拉多纳

今晚德國盃第3圈，有多蒙特作客丙組球隊沙貝魯根，傷兵滿營嘅「蜜蜂兵團」，周末仲有大戰利華古遜嘅後顧，今場照計會派「生牯仔」上陣，但以佢哋嘅質素相信可以照大勝一場，「-2」嘅「讓客」有2倍，一於照捧啦！

（無綫翡翠台周三凌晨3:30直播）
德丙沙貝魯根防守唔掂

多蒙特今季唔知行咩衰運，繼多名後防球員同根度簡等主將長抖後，家陣連中場核心馬高列奧斯、翼鋒巴拉斯塞高斯基同施雲賓達都傷埋，所以教頭高普今場冇得揀，焗住要出青年軍應戰。好彩上場梅開二度嘅羅拔利雲度夫斯基同紐尼沙軒暫時都仲健健康康，照計會由兩位「大佬」領軍，同老將基爾一齊帶住杜基斯治同艾歷杜姆等小將搏殺，絕對有條件大勝一場。

主隊沙貝魯根今季喺丙組嘅戰績未如理想，18戰過後只係排倒數第二，深陷降班危機，失球數更係德丙第2多，反映防守漏洞極多，面對擅於進攻嘅多蒙特，睇嚟大把蛋有得食喇。